ఆరోపణలు నిరూపిస్తావా?

టీడీపీ అధినేత చంద్రబాబు తనపై చేసిన ఆరోపణలను నిరూపించాలని వైఎస్సార్‌సీపీ ఎమ్మెల్యే ద్వారంపూడి చంద్రశేఖర్‌రెడ్డి సవాల్ విసిరారు. అవాస్తమైన ఆరోపణలు చేయడం సరికాదని హితవు పలికారు. విద్యుత్ చార్జీల పెంపు, కోతలకు నిరసనగా నాలుగు రోజులుగా వైఎస్సార్ సీపీ గౌరవాధ్యక్షురాలు విజయమ్మతోపాటు నిరవధిక నిరాహార దీక్ష చేస్తున్న ద్వారంపూడి శుక్రవారం శిబిరం వద్ద విలేకరులతో మాట్లాడారు. తన ఆస్తుల చిట్టా, డాక్యుమెంట్లు అన్నీ ఇస్తానని, బాబు రూ.వెయ్యి కోట్లు అంటూ తన గురించి చేసిన ఆరోపణలను నిరూపించాలన్నారు. ఇది తన బహిరంగ సవాలని పేర్కొన్నారు. ‘వస్తున్నా.. మీకోసం’ పేరుతో యాత్ర చేసి చంద్రబాబు పిచ్చెక్కి ఇష్టానుసారంగా మాట్లాడుతున్నారని ఆయన ధ్వజమెత్తారు. ఒకవైపు రాష్ట్రంలో విద్యుత్ సమస్యతో ప్రజలు బాధపడుతుంటే దాన్ని పట్టించుకోకుండా, అసెంబ్లీకి వచ్చి ప్రభుత్వాన్ని నిలదీయాల్సిందిపోయి పాదయాత్ర చేయటమేంటి? అని ప్రశ్నించారు. పాదయాత్రకు బాబు పూర్తిగా అనర్హుడన్నారు.