రాష్ట్ర దశ-దిశలు మార్చుకుందాం:వైఎస్ జగన్

రాపూరు: టీడీపీ అధ్యక్షుడు చంద్రబాబు నాయుడు బూటకపు హామీలపై వైఎస్సార్ సీపీ అధ్యక్షుడు వైఎస్ జగన్ మోహన్ రెడ్డి మండిపడ్డారు. ఎన్నికల ప్రచారంలో సాధ్యంకాని హామీలను ఇస్తున్న చంద్రబాబు కల్లిబొల్లి మాటలతో ప్రజల ముందుకు వస్తున్నారని విమర్శించారు. ఎన్నికల రోడ్ షోలో భాగంగా నెల్లూరు జిల్లాలోని రాపూరులో ప్రసంగించిన జగన్ కు ప్రజలు బ్రహ్మరథం పట్టారు. చంద్రబాబు నోటికొచ్చిన అబద్ధాలాడుతూ మోస పూరిత రాజకీయాలు చేయాలని చూస్తున్నారన్నారు. ఆ తొమ్మిదేళ్ల తన పాలనలో ఇచ్చిన హామీలను ఎందుకు నేరవేర్చలేదని జగన్ ప్రశ్నించారు. రాష్ట్రంలో మొత్తం 20లక్షల ఉద్యోగాలుంటే.. మూడున్నర కోట్ల ఉద్యోగాలను ఎలా ఇస్తారో ప్రజలకు తెలపాలని జగన్ డిమాండ్ చేశారు.  ఆనాటి ఆయన పాలనలో విద్యార్థుల కష్టాలను కనీసం పట్టించుకున్న పాపాన పోలేదని, ఇప్పుడు ఏదో చేస్తానంటూ మాయమాటలు చెబుతున్నారని జగన్ నిలదీశారు. ఎన్నికల ముందు రెండు రూపాలయ కిలో బియ్యమిస్తామని,అనంతరం  రూ.5.25 చేసిన ఘనత బాబుకే దక్కుతుందన్నారు.
 
చంద్రబాబు తన పాలనలో వృద్ధులకు ముష్టివేసినట్టు 75 రూపాయలు ఇచ్చేవారన్నారు. అధికారం కోసం చంద్రబాబు ఏ గడ్డైనా తింటాడని జగన్ మరోమారు గుర్తు చేశారు. ఎన్నికల ముందు చంద్రబాబు అన్నీ ఫ్రీ అంటూ మాయమాటలు చెప్పి మోసం చేయడానికి వస్తున్నారని, ఆ విషయాన్ని అంతా గమనించాలని ప్రజలకు సూచించారు. ఆయనలా విశ్వసనీయతలేని రాజకీయాలు తాను చేయలేనని జగన్ స్ఫష్టం చేశారు. ప్రజా సంక్షేమం కోసం ప్రమాణస్వీకారం రోజునే  ఐదు సంతకాలు చేస్తానన్నారు. అక్కచెల్లెమ్మల కోసం అమ్మఒడి పథకం ఫైలుపై మొదటి సంతకం చేస్తానని, అవ్వాతాతల పెన్షన్‌ రూ.200 నుంచి 700 చేస్తూ రెండో సంతకం, రైతన్నలకు అండగా ఉండేందుకు రూ.3వేల కోట్లతో ధరల స్థిరీకరణ నిధిపై మూడో సంతకం, డ్వాక్రా రుణాలు మాఫీ చేస్తూ నాల్గో సంతకం చేయడమే కాకుండా, అన్ని రకాల కార్డుల జారీ చేసేలా ఓ వ్యవస్థను ఏర్పాటు చేస్తూ ఐదో సంతకం చేస్తానని తెలిపారు.  ఈ ఐదు సంతకాలతో రాష్ట్ర దిశా-దశను మార్చుకుందామని జగన్ ప్రజలకు భరోసా ఇచ్చారు. రాబోయే ఎన్నికల్లో విశ్వసనీయతకు కట్టుబడి ఉండే వైఎస్సార్ సీపీనే గెలిపించాలని విన్నవించారు.