అబద్ధాలతోనే బాబుకు అధికారం

సాక్షి ప్రతినిధి, కడప: ‘‘నాలుగేళ్లుగా ప్రజల పక్షాన పోరాటం చేస్తున్నాం. అధికారం మనదే అనుకున్నాం. కేవలం 5.6 లక్షల ఓట్ల తేడాతో అధికారానికి దూరమయ్యాం. 3 లక్షల ఓట్లు అటువైపు నుంచి ఇటు పడి ఉంటే అధికారంలోకి వచ్చేవాళ్లం. టీడీపీ అధ్యక్షుడు చంద్రబాబు చెప్పిన ఒక్క అబద్ధంతో అధికారాన్ని కోల్పోయాం. రూ.87 వేల కోట్ల రుణాలు మాఫీ చేస్తామని చంద్రబాబునాయుడు అబద్ధం చెప్పారు. అధికారాన్ని దక్కించుకున్నారు. మనం అబద్ధం చెప్పి ఉంటే అధికారం మనకే దక్కి ఉండేది. మనం విలువలు, విశ్వసనీయతలతో కూడిన రాజకీయాలు చేశాం. వాటికే కట్టుబడి ఉన్నాం. అందుకే అబద్ధం చెప్పలేదు. ఇవే విలువలకు కట్టుబడి ఉందాం. ప్రజల పక్షాన పోరాటాలు కొనసాగిద్దాం’ అని వైఎస్సార్ కాంగ్రెస్ పార్టీ అధ్యక్షుడు వైఎస్ జగన్‌మోహన్‌రెడ్డి చెప్పారు.

గురువారం ఇక్కడి పార్టీ కార్యాలయంలో జరిగిన కడప కార్పొరేటర్ల సమావేశంలో ఆయన మాట్లాడుతూ.. ‘‘ప్రజలు అబద్ధాన్ని ఒకసారి నమ్ముతారు. ఐదు సంవత్సరాల తర్వాత ఇంటికి పంపుతారు.’’ అని చెప్పారు. స్థానిక సంస్థల ప్రతినిధులను భయపెట్టి పార్టీ ఫిరాయింపులకు ప్రోత్సహిస్తున్నారని జగన్ విమర్శించారు.