టీడీపీ అరాచకాలకు అడ్డు లేదా?

హైదరాబాద్ : తెలుగుదేశం పార్టీ ప్రభుత్వం అరాచకాలకు అడ్డు అదుపు లేకుండాపోతోందని వైఎస్ఆర్ సీపీ అధికార ప్రతినిధి వాసిరెడ్డి పద్మ మండిపడ్డారు. నెల్లూరు జిల్లా పరిషత్ ఎన్నిక జరుగుతున్న తీరుపై హైకోర్టులో కేసు దాఖలు చేసిన న్యాయవాది పొన్నవోలు సుధాకర్ రెడ్డిపై నెల్లూరు పోలీసుల దౌర్జన్యాన్ని ఖండిస్తున్నట్లు ఆమె తెలిపారు. బుధవారం నాడు ఆమె విలేకరుల సమావేశంలో మాట్లాడారు. న్యాయవాదినే అపహరించే స్థాయికి దిగజారితే ఇక సామాన్యులకు రక్షణ ఎక్కడ ఉంటుందని ప్రశ్నించారు. టీడీపీ అక్రమాలపై కేసులు వేయడమే సుధాకర్‌రెడ్డి చేసిన తప్పా అంటూ నిలదీశారు. ప్రజాస్వామ్యం మీద ఏమాత్రం గౌరవం ఉందో తెలుగుదేశం పార్టీ నాయకులు చెప్పాల్సిన అవసరం ఉందన్నారు.

చంద్రబాబు ఏ మొహం పెట్టుకుని జిల్లాల పర్యటన చేస్తున్నారని, ఆయన చేసిన ఐదు సంతకాలు ఐదు అబద్ధాలుగా మారాయని వాసిరెడ్డి పద్మ విమర్శించారు. చంద్రబాబు అధికారంలోకి వచ్చారు.. మళ్లీ కరువు వస్తుందని ప్రజలు భయపడుతున్నారని ఎద్దేవా చేశారు. ప్రజలకిచ్చిన హామీలు చిత్తశుద్దితో అమలు చేయాలని చంద్రబాబుకు సూచించారు.