నేడు ‘పాదయాత్ర-మై డైరీ’ పుస్తకావిష్కరణ

దివంగత ముఖ్యమంత్రి డాక్టర్ వైఎస్ రాజశేఖరరెడ్డి చేసిన పాదయాత్ర ‘ప్రజాప్రస్థానం’ స్మృతులపై రూపొందించిన ‘పాదయాత్ర- మై డైరీ’ పుస్తకాన్ని శుక్రవారం న్యూఢిల్లీలో ఆవిష్కరించనున్నారు. 2003లో ‘ప్రజాప్రస్థానం’ పేరిట మండుటెండలో 58 రోజులపాటు పాదయాత్ర నిర్వహించిన వైఎస్ నాడు ప్రజలు ఎదుర్కొంటున్న సమస్యలతోపాటు తన అనుభవాలను స్వయంగా డైరీలో రాసుకున్నారు. వైఎస్ మరణించి సెప్టెంబర్ 2 నాటికి మూడేళ్లు పూర్తయిన సందర్భంగా ఆయన సన్నిహితుడు, రాజ్యసభ సభ్యుడు కేవీపీ రామచంద్రరావు తాజాగా ఆ వివరాలను ‘పాదయాత్ర - మై డైరీ’ పేరిట పుస్తకంగా రూపొందించారు. ఏపీ భవన్‌లో శుక్రవారం ఏర్పాటు చేసిన పుస్తకావిష్కరణ కార్యక్రమానికి ఏఐసీసీ కోశాధికారి మోతీలాల్‌వోరా, పార్టీ రాష్ట్ర వ్యవహారాల ఇన్‌చార్జి గులాంనబీ ఆజాద్‌తోపాటు పలువురు కేంద్ర మంత్రులు, ఏఐసీసీ నేతలు హాజరు కానున్నారు. ఈ కార్యక్రమానికి సోనియాగాంధీ తన సందేశాన్ని పంపినట్లు తెలిసింది. కేవీపీ ఆహ్వానం మేరకు రాష్ట్రానికి చెందిన పలువురు నేతలు పుస్తకావిష్కరణలో పాల్గొనేందుకు ఢిల్లీ వె ళ్లారు. ఇందులో పీసీసీ అధ్యక్షుడు బొత్సతోపాటు మంత్రులు వట్టి వసంతకుమార్, రఘువీరా, ఆనం రామనారాయణరెడ్డి, శ్రీధర్‌బాబు తదితరులున్నారు.