వైఎస్సార్ సీపీని బలోపేతం చేయండి

వరంగల్, న్యూస్‌లైన్ : జిల్లా వ్యాప్తంగా వైఎస్సార్‌సీపీని బలోపేతం చేసేందుకు కలిసికట్టుగా పని చేయాలని ఆ పార్టీ అధ్యక్షుడు వైఎస్ జగన్‌మోహన్‌రెడ్డి కోరారు. హైదరాబాద్‌లోని పార్టీ కార్యాలయంలో సోమవారం జిల్లా కు చెందిన ముఖ్యనేతలతో సమావేశమయ్యారు. జిల్లాలో నియోజకవర్గాల వారీగా పార్టీ పరిస్థితిని తెలుసుకున్నారు. పార్టీ కి ఎదురవుతున్న ఇబ్బందు లు పరిష్కార మార్గాలను సూచించారు. దివంగత మహానేత వైఎస్సార్‌కు తెలంగాణ ప్రాంతంలో.. ముఖ్యంగా వరంగల్ జిల్లాలో ఎంతో ఆదరణ ఉందన్నారు. వైఎస్ ఆకస్మిక మృతి తర్వాత రాష్ట్రంలో సంక్షేమ పథకాలు భ్రష్టు పట్టిపోయాయని ఆవేదన వ్యక్తం చేశారు. వైఎస్సార్‌సీపీ ఈ ప్రాంతంలో కూడా తన పునాదులు పటిష్టం చేసుకుంటుందని స్పష్టం చేశారు. ఖమ్మం, నల్లగొండ జిల్లాల పర్యటన తర్వాత జిల్లాలో ఓదార్పు యాత్ర చేపడుతామని చెప్పారు.
 
  వైఎస్సార్‌సీపీ రాష్ట్ర భవిష్యత్ దృష్ట్యా సమైక్య నినాదం తీసుకున్నదని, తెలంగాణ ప్రజల మనోభావాలకు వ్యతిరేకం కాదనే విషయాన్ని వివరించారు. క్షేత్ర స్థాయి నుంచి పార్టీ బలపేతం చేసేందుకు నియోజకవర్గ కోఆర్డినేటర్లు కృషి చేయాలన్నారు. ఈ సమావేశంలో పార్టీ జిల్లా అధ్యక్షుడు ముత్తినేని సోమేశ్వర్‌రావు, నగర అధ్యక్షుడు తుమికి రమేష్‌బాబు, నియోజకవర్గ కోఆర్డినేటర్లు, నాయకులు బీరం సంజీవరెడ్డి, కుడితి మహేందర్‌రెడ్డి, తక్కెళ్ళపల్లి రాము, బొజ్జపల్లి రాజయ్య, జెన్నారెడ్డి మహేందర్‌రెడ్డి,  నాడెం శాంతికుమార్, దైద క్రిష్టఫర్, సుజాతామంగీలాల్, యుగంధర్‌రెడ్డి, దేవానాయక్ తదితరులు పాల్గొన్నారు.