నేడు వైఎస్సార్ సీపీ విద్యుత్ ధర్నా

విద్యుత్ సంక్షోభాన్ని పరిష్కరించడంలో రాష్ట్ర ప్రభుత్వ ఘోర వైఫల్యానికి నిరసనగా వైఎస్సార్ కాంగ్రెస్ పార్టీ మంగళవారం అన్ని అసెంబ్లీ నియోజకవర్గ ప్రధాన కేంద్రాల్లో ధర్నా లు చేపట్టనుంది. ఈ ‘విద్యుత్ ధర్నా’లో పాల్గొని.. ప్రభుత్వ వైఖరిపై నిరసన వ్యక్తం చేయడానికి సామాన్య ప్రజలు ఎక్కడికక్కడ సన్నద్ధమవుతున్నారు. విజయవాడలోని విద్యుత్ శాఖ ఎస్‌ఈ కార్యాలయం వద్ద జరిగే ధర్నాలో వైఎస్సార్ సీపీ గౌరవాధ్యక్షురాలు వై.ఎస్.విజయమ్మ స్వయంగా పాల్గొంటున్నారు. పార్టీ ఎంపీ, ఎమ్మెల్యేలు, మద్దతిస్తున్న ఎమ్మెల్సీలు వారి వారి నియోజకవర్గ కేంద్రాల్లో ధర్నాలో పాల్గొని, నిరసన వ్యక్తం చేస్తారు. పార్టీ అనుబంధ సంఘాల నేతలు, ముఖ్య నేతలూ పాల్గొంటారు. ధర్నా సందర్భంగా విద్యుత్ సంక్షోభ పరిష్కారంలో ప్రభుత్వ నిష్క్రియాపరత్వాన్ని ఎత్తి చూపడంతో పాటు ఉన్నతాధికారులకు పార్టీ తరఫున వినతిపత్రాలను
సమర్పిస్తారు.