బాబు పాలనంటే భయం

టెక్కలి/శ్రీకాకుళం అర్బన్, న్యూస్‌లైన్: 2004కు ముందు టీడీపీ నాయకుడు చంద్రబాబు పాలనంటేనే ప్రజలు భయాందోళన చెందేవారని, ఆ తరువాత పాలన పగ్గాలు చేపట్టిన దివంగత ముఖ్యమంత్రి వైఎస్ రాజశేఖరరెడ్డి పాలన ప్రజలకు అభయాన్ని ఇచ్చిందని వైఎస్‌ఆర్ కాంగ్రెస్ పార్టీ శ్రీకాకుళం పార్లమెంటు నియోజకవర్గ అభ్యర్థి రెడ్డి శాంతి అన్నారు. సంతబొమ్మాళి మండలంలోని వడ్డితాండ్ర, శ్రీకాకుళంలోని వైఎస్‌ఆర్ కూడలిలో మంగళవారం జరిగిన వైఎస్‌ఆర్ సీపీ గౌరవాధ్యక్షురాలు వైఎస్ విజయమ్మ సభల్లో ఆమె ప్రసంగించారు. బాబు పాలనలో రైతులు, వృద్ధులు, వితంతువులు, విద్యార్థులు, ఉద్యోగులు ఇలా అన్ని వర్గాల ప్రజలు క్షోభను అనుభవించారన్నారు.

 ఇదే సమయంలో పాదయాత్ర చేపట్టిన వైఎస్ ప్రజల కష్టసుఖాలను నేరుగా తెలుసుకొని జనం మద్దతుతో ముఖ్యమంత్రి బాధ్యతలు చేపట్టారన్నారు. ప్రజల కష్టాలను తీర్చడంతోపాటు అనేక సంక్షేమ పథకాలను ప్రవేశపెట్టి మంచి పాలనను అందించారన్నారు. ఆయన ప్రవేశపెట్టిన సంక్షేమ పథకాలతో ప్రజలు హాయిగా జీవించారన్నారు. అటువంటి పాలన మళ్లీ వైఎస్ జగన్‌మోహన్‌రెడ్డే అందించగలరన్నారు. ఫ్యాన్ గుర్తుకు ఓటేసి జగన్‌ను సీఎం చేయాల్సిన ఉందన్నారు. ప్రజల పక్షాన నిత్యం పోరాటాలు చేస్తున్న జగన్‌ను ముఖ్యమంత్రి చేయలేక పోతే, అంతకంటే దారుణమైన విషయం మరొకటి ఉండదన్నారు.  
 
 సైకిల్‌కు రిపేర్
 ఎచ్చెర్ల క్యాంపస్: చిలకపాలెం సభలో పాల్గొన్న విజయనగరం వైఎస్‌ఆర్‌సీపీ ఎంపీ అభ్యర్థి బేబే నాయన మాట్లాడుతూ సైకిల్‌కు రిపేర్ అయ్యిందని, దీంతో చంద్రబాబు దాన్ని బీజేపీ వర్కు షాపునకు అప్పగించారని ఎద్దేవా చేశారు. ఫ్యాన్ గాలిలో బీజేపీ, టీడీపీలు కొట్టుకుపోవడం ఖాయమన్నారు. బాబు ఇస్తున్న హామీలను ప్రజలను నమ్మేస్థితిలో లేరన్నారు.