గాలి మాటలు మానుకో: అంబటి

వైఎస్సా ర్ కాంగ్రెస్ అధినేత జగన్‌మోహన్‌రెడ్డి సోదరి షర్మిల కాలికి అసలు సర్జరీనే జరగలేదని టీడీపీ నేత గాలి ముద్దుకృష్ణమనాయుడు చేసిన ఆరోపణపై వైఎస్సార్ కాంగ్రెస్ అధికార ప్రతినిధి అంబటి రాంబాబు, మాచర్ల ఎమ్మెల్యే పిన్నెల్లి రామకృష్ణారెడ్డి మండిపడ్డారు. గురువారం గుంటూరులో జరిగిన విలేకరుల సమావేశంలో అంబటి, మాచర్లలోని నెహ్రూ నగర్‌లో పిన్నెల్లి మాట్లాడారు. తెలుగుదేశం పార్టీ నాయకులు నీచ ఆరోపణలు చేస్తూ రాజకీయాలు చేయడం సరికాదని అంబటి అన్నారు. షర్మిలకు అసలు సర్జరీ జరగలేదని, దెబ్బే తగలలేదని, ఆపరేషన్ అంతా డ్రామా అని గాలి వ్యాఖ్యానించడం దురదృష్టకరమన్నారు. 

అలిపిరిలో బాంబు పేలుడులో నాటి సీఎం, టీడీపీ అధ్యక్షుడు చంద్రబాబునాయుడు తీవ్రంగా గాయపడితే మహానేత వైఎస్ రాజశేఖరరెడ్డి తిరుపతిలో మౌన దీక్ష చేశారని, హెలిప్యాడ్‌లో చంద్రబాబును చూసి ఆయన కన్నీళ్ళు కూడా పెట్టుకున్నారని గుర్తు చేశారు. కాని టీడీపీ నేతలు, చంద్రబాబు ఈ తరహా కక్షపూరిత రాజకీయాలు చేయడం సరికాదని, దమ్ముంటే షర్మిల కాలికి గాయాలు కాలేదని నిరూపించగలరా అని ప్రశ్నించారు. షర్మిల గాయంపై నీచమైన ఆరోపణలు చేసిన గాలి బేషరతుగా ఆ వ్యాఖ్యలు ఉపసంహరించుకోవాలని పిన్నెల్లి రామకృష్ణారెడ్డి డిమాండ్ చేశారు. రోజుకో పార్టీలో చేరి రాజకీయ వ్యభిచారిగా మారిన ముద్దుకృష్ణమకు ఎదుటివారిపై నోటికొచ్చినట్లు మాట్లాడటం అలవాటైందన్నారు. ‘మరో ప్రజాప్రస్థానా’నికి వస్తున్న ఆదరణ చూసి ఓర్వలేకే ఈ తరహా వ్యాఖ్యలు చేస్తున్నారన్నారు. వాటిని వెనక్కు తీసుకోకుంటే ప్రజలే తగిన బుద్ధి చెబుతారని హెచ్చరించారు.